«Երեխայի առողջության պետական հավաստագիրը»՝ 2011–ից

Լուրջ նվաճում երեխաների բուժման որակի բարելավման ուղղությամբ: 2011թ. հունվարի 1-ից, ՀՀ կառավարության 2010 թվականի օգոստոսի 27-ի թիվ 35 արձանագրային որոշմամբ, մեր երկրում կներդրվի «Երեխայի առողջության պետական հավաստագիր» ծրագիրը։

Մանկական հիվանդանոցային օգնության մատչելիությանը եւ որակի բարելավմանն ուղղված այս քայլով կապահովվի «Ծննդօգնության պետական հավաստագիր» ծրագրի շարունակականությունը։

Երեկ ՀՀ առողջապահության նախարարությունը եւ «Վորլդ Վիժն» միջազգային բարեգործական կազմակերպությունը «Արմենիա-Մարիոթ» հյուրանոցում ներկայացրին ծրագիրը՝ «Երեխայի առողջությունն առաջնային է» քարոզարշավի շրջանակներում։

Դեռ հոկտեմբերին մանկական հիվանդանոցային բուժօգնության բարելավմանը նվիրված առողջապահության համաշխարհային կազմակերպության եվրոպական տարածաշրջանային խորհրդակցության ժամանակ ՀՀ առողջապահության նախարար Հարություն Քուշկյանը մանկաբուժության ոլորտը Հայաստանում գնահատեց բավարար՝ միաժամանակ նշելով, որ անելիքները դեռ շատ-շատ են։

Մասնավորապես, նախարարը վստահեցրեց, որ 2011–ից ներդրվող «Երեխայի առողջության պետական հավաստագիրը» մանուկների անվճար բուժօգնությունը լիարժեք եւ քաղաքակիրթ երկրների չափանիշներին համապատասխան կազմակերպելու հնարավորություն կտա։
«Երեխաները մեր երկրի ապագան են, ուստի նրանց առողջության պահպանումն առաջնահերթ խնդիր է բոլորիս համար։ Մոր եւ մանկան առողջության պահպանման հիմնախնդիրը, որպես հատուկ ծրագրային ոլորտ, կարեւորված են երկրի հիմնական ռազմավարական փաստաթղթում՝ կայուն զարգացման ծրագրում։

Ունենալով մեծ փորձ եւ փայլուն մասնագետներ՝ մենք ունակ ենք բարեփոխումներ իրականացնել։ Մենք կարողացանք հաջողությամբ ներդնել «Ծննդօգնության պետական հավաստագրի» համակարգը։ Ծրագրի դրական արդյունքներն ակնհայտ են եւ արտացոլված են այդ ծառայության որակն արտացոլող ցուցանիշներում։ Որպես այդ դրական փորձի տրամաբանական շարունակություն՝ 2011թ. հունվարի 1-ից կներդրվի «Երեխայի առողջության պետական հավաստագիրը», որի շնորհիվ կբարձրանա մանկական հիվանդանոցային բժշկական օգնության որակը, կապահովվի մատչելիությունը», - երեկ ասաց նախարարը։   

    
ՀՀ Ազգային ժողովի առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանը, բերելով վիճակագրական տվյալներ, փաստեց, որ Հայաստանում յուրաքանչյուր տարի մինչեւ մեկ տարեկան 400-ից ավելի երեխաներ են մահանում, ինչը կարելի կլիներ նվազեցնել ֆինանսական համապատասխան միջոցների առկայության դեպքում։

Միաժամանակ նշվեց, որ վերջին տարիներին ոլորտում բյուջետային հատկացումների զգալի աճ է արձանագրվել. 2007-2010 թվականների ընթացքում պետբյուջեից այս նպատակով տրամադրվող գումարի եռակի աճ կա։ 2011-ի բյուջեով երեխաների հիվանդանոցային բուժօգնության համար կրկնակի ավելի միջոցներ են նախատեսվել, քան ոլորտի մյուս բոլոր ճյուղերի համար։ Երեխաների հիվանդանոցային բուժման որակի բարելավման ուղղությամբ սա լուրջ նվաճում է։

ՀՀ առողջապահության նախարարության մոր եւ մանկան առողջության պահպանման 2011թ. պետական նպատակային ծրագրի շրջանակներում, 2011թ. հունվարի 1-ից ներդրվող 0-7 տարեկան երեխաների հավաստագրի համակարգի կայացման երաշխիք է 2011թ. առողջապահության բյուջեում նախատեսված լրացուցիչ 3,13 մլրդ դրամը։ Երեխաներին մատուցվող հիվանդանոցային ծառայությունների փոխհատուցմամբ եւ բուժանձնակազմի աշխատավարձերը շուրջ 2 անգամ բարձրացնելով հնարավոր կլինի բարելավել երեխաների հիվանդանոցային օգնության մատչելիությունը եւ որակը, կրճատել հիվանդանոցներում մանկական մահացության դեպքերը եւ նվազեցնել համակարգում տեղ գտած ոչ պաշտոնական վճարումները։

«Վորլդ Վիժն»-ի հայաստանյան գրասենյակի ներկայացուցիչ Գրեյմ Սթրոնգը նշեց, որ Հայաստանում երեխաների առողջությունը գերակա խնդիր է, եւ այդ ոլորտում ցանկացած ներդրում արդարացված է։

«Այս նախագծին մեր աջակցության շարժառիթը Հայաստանում առողջապահության ոլորտում առկա անհավասարության խնդիրն է։ Հայաստանի երեխաների համար պետք է ստեղծել առողջ ապագայի հնարավորություն», - ասաց նա։

Ներկայացնելով ծրագիրը՝ ՀՀ առողջապահության նախարարության մոր եւ մանկան առողջության պահպանման բաժնի պետ Կարինե Սարիբեկյանը նշեց, որ համատեղ ջանքերով պետք է ցանկալի արդյունքների հասնեն նաեւ այս ոլորտում։

Այդ նպատակով նախապատրաստական լուրջ աշխատանքներ են իրականացվել, կազմակերպվել են բազմաթիվ հանդիպումներ առողջապահության կազմակերպիչների, մանկական հիվանդանոցների ղեկավարների, բուժանձնակազմերի եւ շահագրգիռ այլ կազմակերպությունների հետ։

Այսպիսով, ՀՀ առողջապահության նախարարության մոր եւ մանկան առողջության պահպանման 2011-ի պետական նպատակային ծրագրի շրջանակներում, 2011թ. հունվարի 1-ից ներդրվում է 0-7 տարեկան երեխաների հավաստագրի համակարգը։

Հավելենք, որ ծրագրի նախապատրաստական աշխատանքներին մասնակցել են նաեւ ԱՄՆ-ի ՄԶԳ/ՆՕՎԱ, ԱՀԿ եւ միջազգային այլ կազմակերպություններ։ Մշակվել եւ «Վորլդ Վիժն» բարեգործական կազմակերպության աջակցությամբ տպագրվել են 0-7 տարեկան երեխաների հավաստագրերը, ինչպես նաեւ դրա վերաբերյալ տեղեկատվական պաստառները։

Առողջապահության նախարարության, «Վորլդ Վիժն»-ի եւ ՄԱԿ-ի մանկական հիմնադրամի կողմից մշակվել եւ տպագրվել են նաեւ երեխայի առողջության անձնագրերը։ Դրանցում տեղ են գտել տեղեկություններ երեխայի խնամքի, սնուցման, առողջ աճի եւ զարգացման, հիվանդությունների կանխարգելման վերաբերյալ։

Հարցեր, պատասխաններ, մեկնաբանություններ